ବଣାଇ : ସୁନ୍ଦରଗଡ ଜିଲା ଲହୁଣୀପଡ଼ା ଥାନାର ଗଣିଘଷା ଗ୍ରାମରେ ଶନିବାର ସକାଳୁ କାହ୍ନୁଚରଣ ମାହାନ୍ତ ଶୌଚ ହେବାକୁ ନିକଟସ୍ଥ ନାଳକୁ ଯାଉଥିବା ବେଳେ ଚାରିଜଣ ଦୁର୍ବୃତ୍ତ ଆସି ତାଙ୍କୁ ମାଡି ବସିଥିଲେ। ଜବରଦସ୍ତି ପେଟ୍ରୋଲ ପିଆଇବା ପରେ ଦେହରେ ଢାଳି ତା’ ପରେ ନିଆଁ ଲଗାଇଥିଲେ। ଚିତ୍କାର କରିବାରୁ ଗ୍ରାମବାସୀ ପହଞ୍ଚିଥିଲେ। ତାଙ୍କୁ ସଙ୍ଗେ ସଙ୍ଗେ ଲହୁଣୀପଡ଼ା ଡାକ୍ତରଖାନା ଓ ଅବସ୍ଥା ସଂକଟାପନ୍ନ ହେବାରୁ ପରେ ରାଉରକେଲା ଆଇଜିଏଚକୁ ସ୍ଥାନାନ୍ତରିତ କରାଯାଇଛି। ଜମି ବାଡ଼ି ବିବାଦରୁ ଏଭଳି ଘଟଣା ହୋଇଛି ବୋଲି ଘର ଲୋକ ଅଭିଯୋଗ କରିଛନ୍ତି। ବିନା ଅନୁମତିରେ ନିଜ ଜମିରେ ନିଜ ପରିବାର ଲୋକ ଲିଜ୍‌ରେ ପେଟ୍ରୋଲ ଟାଙ୍କି ଦେଇଥିବା ଓ ଆରଟିଆଇ ମାଗିଥିବାରୁ ଏଭଳି ଘଟଣା ଘଟିଛି ବୋଲି ଅଭିଯୋଗ ଆସିଛି। ଏନେଇ ଲହୁଣୀପଡ଼ା ପୋଲିସ ତଦନ୍ତ ଚଳାଇଛି। ଘଟଣାସ୍ଥଳରୁ ଦିଆସିଲି, ପେଟ୍ରୋଲ ବୋତଲ ଓ ଚପଲ ଜବତ ହୋଇଛି।