ପାଟଣାଗଡ଼, (ସୂପ୍ରଭାତ ଓଡ଼ିଶା): ବଲାଙ୍ଗୀର ଜିଲ୍ଲା ପାଟଣାଗଡ଼ ଥାନା ପୁଲିସକୁ ବଡ ସଫଳତା ମିଳିଛି। ଡକାୟତି ଅଭିଯୋଗରେ ପୁଲିସ ୬ ଜଣ ଯୁବକଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ବିଭିନ୍ନ ମାରଣାସ୍ତ୍ର, ୬ଟି ମୋବାଇଲ୍‌ ଫୋନ୍‌ ଓ ଗୋଟିଏ ପିସତଲ ଜବତ କରିଛି। ଗିରଫ ଅଭିଯୁକ୍ତମାନେ ପାଟଣାଗଡ଼ ଥାନା ଅଞ୍ଚଳର କାଲିଆ ମେହେର, ବାବୁଲୁ ବଗର୍ତ୍ତି, ସୋନୁ ଦେହେରୀ, ସୁମିତ ପୋଡ଼, ଦେବାଶିଷ ଆଚାର୍ଯ୍ୟ ଓ ସଲ୍ୟ ଦଲେଇ। ପୁଲିସ ସେମାନଙ୍କ ନିକଟରୁ ଗୋଟିଏ ଟାଙ୍ଗିଆ, ଗୋଟିଏ ତରୱାର, ଗୋଟିଏ ଲୁହା ରଡ୍‌, ଗୋଟିଏ ପିସ୍ତଲ, ୬ଟି ମୋବାଇଲ୍‌ ଜବତ କରିଛି । ସୂଚନା ଅନୁଯାୟୀ, ଗତ ୨୦ ତାରିଖରେ ପାଟଣାଗଡ଼ରେ ବଏଲ୍‌ ଯାତ୍ରା ଚାଲିଥିବା ସମୟରେ ଏହି ଡକାୟତି ଘଟଣା ଘଟିଥିଲା। ଏନେଇ ଥାନାରେ ଅଭିଯୋଗ ହେବାପରେ ଘଟଣାର ତଦନ୍ତ ଆରମ୍ଭ କରିଥିଲା । ତଦନ୍ତ ପରେ ପୁଲିସ ୬ ଜଣଙ୍କୁ ଗିରଫ କରିଛି । ଏ ନେଇ ପୁଲିସ କେସ୍‌ ନମ୍ବର ୨୭୨ରେ ଏକ ମାମଲା ରୁଜୁ କରି ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରିଛି।