ବଲାଙ୍ଗିର: ଗଞ୍ଜେଇ ଚାଲାଣର ଅଭିନବ ପ୍ରୟାସ । କ୍ଷୀର ପାତ୍ରରେ ହେଉଥିଲା ଗଞ୍ଜେଇ ଚାଲାଣ । ବଲାଙ୍ଗିର ଜିଲ୍ଲାରେ ଗଞ୍ଜେଇ ଚାଲାଣ କରାଯାଉଥିବା ବେଳେ ଏହାକୁ ପଣ୍ଡ କରିଛି ତୁଷୁରା ଅବକାରୀ ବିଭାଗ। କ୍ଷୀର ପାତ୍ର ଭିତରେ ଲୁଚାଇ ରଖାଯାଇଥିବା ପ୍ରାୟ ୪୪ କେଜି ଗଞ୍ଜେଇକୁ ଜବତ କରାଯାଇଛି ।  ଏହି ଘଟଣାରେ ସମ୍ପୃକ୍ତ ଥିବା ୩ ଜଣଙ୍କୁ ଗିରଫ କରାଯାଇଛି। ଗିରଫ ଅଭିଯୁକ୍ତ ମାନେ ହେଲେ ଛତିଶଗଡ଼ ବିଳାସପୁର ଅଞ୍ଚଳର ମୋହିତ ବୈଷ୍ଣବ, ସୁରଜ ମହାନ ଏବଂ ରାଜୁ ବଂଶଲ । ଗଞ୍ଜେଇ ମାଫିଆମାନେ ପୋଲିସ ଓ ଅବକାରୀ ବିଭାଗକୁ ଚକମା ଦେବା ପାଇଁ କ୍ଷୀର ପାତ୍ରର ବ୍ୟବହାର କରିଥିଲେ। ମିଳିଥିବା ଗୁପ୍ତ ସୂଚନା ଆଧାରରେ ତୁଷୁରା ଅବକାରୀ ବିଭାଗ ଦେଓଗାଁ ଥାନା ଅନ୍ତର୍ଗତ କୁକୁରଖାଇ ଛକ ନିକଟରେ ଛକି ରହିଥିଲେ। କୁକୁରଖାଇ-ତୁଷୁରା ରାସ୍ତାରେ ଯାଉଥିବା ଦୁଇଟି ମୋଟରସାଇକେଲକୁ ଅଟକାଇ ଯାଞ୍ଚ କରିବା ପରେ ଏହି ବେଆଇନ କାରବାରର ପର୍ଦ୍ଦାଫାଶ ହୋଇଥିଲା । ଅବକାରୀ ବିଭାଗର କହିବା ଅନୁଯାୟୀ, ସେମାନେ ବୌଦ୍ଧ ଜିଲ୍ଲାର ଦେଉଳି ଅଞ୍ଚଳରୁ ବଲାଙ୍ଗିର ଅଭିମୁଖେ ଏହି ଗଞ୍ଜେଇ ଚାଲାଣ କରୁଥିଲେ। ଅବକାରୀ ଅଧିକାରୀମାନେ ଗଞ୍ଜେଇ ସମେତ ଦୁଇଟି ମୋଟରସାଇକେଲ ଏବଂ ବିଭିନ୍ନ ରାଜ୍ୟର ଏକାଧିକ ନମ୍ବର ପ୍ଲେଟ୍ ଜବତ କରିଛନ୍ତି। ତୁଷୁରା ଏବଂ ଏହାର ଆଖପାଖ ଅଞ୍ଚଳରେ ଲଗାତାର ଗଞ୍ଜେଇ ଚୋରାଚାଲାଣ ବୃଦ୍ଧି ପାଉଥିବାରୁ ପ୍ରଶାସନ ପାଇଁ ଚିନ୍ତା ବଢ଼ିଛି।